حوار مع بائع كتب

من كام يوم كنت بشتري كتاب وانا بدور علي اللي انا عاوزاه بسال صاحب المحل عن كاتب معين لقيته ما صدق حد يكلمه وفوجئت بيه بيتكلم بمنتهي المراره عن شاب راحله وبيقوله انا معايا ماجستير بس معرفش حاجه عن السياسه عاوزك تنقيلي كتاب يفهمني يعني ايه سياسه طبعا صاحب المكتبه بيحكيلي وهو منفعل جدا قلتله حضرتك كلنا بعد الثوره عاوزين نفهم لاننا فعلا مش فاهمين قالي فيه فرق بين الفهم وبين قله الثقافه العامه لانها بتعمل للانسان ارضيه بيها يقدر يستوعب بسرعه اللي بيحصل لكن اللي مزعلني ان شاب زي ده ومعاه ماجستير وكمان مش مثقف الثقافه اللي تخليه يعرف يختار الكتاب اللي هو محتاجله بعد ما خلصت كلام معاه لقيتني رايحه لكتاب بيتكلم عن الدستور في مصر فعلا احنا محتاجين نفهم وبرضه للاسف فيه شباب كتير ملهاش علاقه بالكتاب ولا القراءه كلام الراجل ده فكرني بوالدي علي الرغم انه انسان مش متعلم لكن اقدر اقول عنه انه مثقف او انسان واعي ومدرك لكل مرحله بنمر بيها وافتكرت انه كان بيشتريلنا قصص وكتب كتير واحنا صغيرين وده نما جوانا انا واخواتي حب القراءه اللي للاسف مفيش حد مهتم بيها دلوقتي واعتماد الشباب الاساسي علي النت في اكتساب وتداول المعلومات لكن للامانه انا لن ادعي الثقافه لاني كنت مهتمه بالقراءه حتي بعد الانتهاء من المرحله الجامعيه لكن الزواج والحياه الجديده ابعدتني عن هوايتي المفضله حتي جاءت الثوره وفتحت كل الابواب المغلقه داخل عقلي وذكرتني بكل ما كنت احبه قديما وشعرت بالحنين اليه الان( القراءه والكتابه) لا اعرف اذا كان هذا مجرد تاثر بالاحداث وسيزول سريعا ام انني سوف استمر بالكتابه لكن كل ما اعرفه الان ان القراءه مهمه جدا عرفت قيمتها الان علي الرغم من حبي لها في الاصل وانا اتحدث لصاحب المكتبه سالته مفيش سي ديهات لتعليم الاطفال الحروف والارقام لابني لقيته خلاص شويه وهيزعقلي قالي حرام عليكي ده كله كلام فارغ هاتي لولادك كتب وبس لازم تنمي القراءه عندهم كفايه الشباب الغير مثقف اللي بنشوفه كل يوم وجدت كلامه فعلا مهم لابد ان ننمي القراءه داخل ابنائنا علي الاقل كما رباني ابي ساربي ابنائي وارجو من كل ام واب ان يهتمو بابنائهم لا يكتفو بتوفير اجهزه الكمبيوتر والالعاب لكن ايضا الكتب حتي يكبرو علي تنميه عقولهم وثقافتهم.