احباط مابعد الثوره

من يومين كنت بتكلم مع صديق وثائر غيور علي وطنه لقيته محبط بشده من الثوره وسوء الاحوال اللي احنا فيها بقيت اسال نفسي ايه اللي وصله لكده من قمه السعاده والامل بقيام الثوره لقمه الياس من اللي بيحصل حوالينا قالي جمله واحده وجعت قلبي دم اللي ماتو راح علي الارض كلامه ده خلاني مصدومه من حاجات كتير اولها اني اتفاجئت انه فعلا عنده حق لوبصينا حوالينا هنلاقي ايه؟
 سرقه وبلطجه طبعا مش بالصوره اللي عاوزه توصلهالنا وسائل الاعلام الحاليه واللي بتمارس نفس دورها القديم في توصيل رسائل محدده للشعب علي سبيل الرعب والتخويف لكن الوضع حقيقي سئ ده غير الاحزاب اللي بدات تشنع وتخون في بعض بدل من ان يتحدو والاشخاص اللي دخلو في صراعات سابو البلد اللي بتغرق وبيتخانقو مع بعض بدل ما يعملو بالمثل القائل الاتحاد قوه علي ما نوقف البلد علي رجليها وطبعا علي سبيل المثال لا الحصر طلعت السادات ومصطفي بكري ده غير اللي بيحصل جوه دائره الاخوان وبعض والانشقاقات اللي بينهم حاليا ده غير بياناتهم وتصريحاتهم الغريبه المهم كل واحد في وادي ناس كتير من اللي حواليا كانو بيتهموني بشده التفاؤل وكان عندهم حق لكن دلوقتي حسه بالقلق والرعب من كل ده وطبعا اللي فات ده كله كوم ومواقف المجلس العسكري وتعدد اخطاؤه طول الفتره اللي فاتت وناهيك عن شله الحراميه اللي مشرفين طره والباشا الكبير بتاعهم اللي قاعد في شرم والاخبار اللي كل شويه بنسمعها عن حالته الصحيه وضغطه اللي علي ونزل والاكتئاب اللي هو فيه بالذمه ده اسمه كلام يهمنا في ايه ضغطه ولا اكتئابه يفرق في ايه راجل زي ده امر بقتل شباب زي الورد بدم بارد ولا فكر في ام ابنها اتعمي ولا مات ده غير بقي الارصده اللي عرفنا بعدين ان مفيش امر مباشر صدر من النائب العام بتجميدها الا بعد ما كل واحد رتب اموره والفلوس ضاعت كل ده للاسف شئ يدعو للياس والاسف علي حالنا وحال ثوره عظيمه زي اللي قمنا بيها وحدو صفوفكم يا مصريين سيبو اهدافكم الشخصيه ودورو علي حال البلد عشان تقدرو توصلو للي انتو عاوزينه مفيش سياسي هينجح ولا حزب هيبقي ليه اسم الا لما يشارك بشكل فعال في نهضه البلاد بغض النظر عن مصلحته ويوم ما البلد ترجع تاني لعظمتها كل واحد هياخد وضعه ويبقو يتخانقو ويشتغلو سياسه زي ما هما عاوزين المهم دلوقتي نلحق بلدنا قبل ما نرجع تاني للي كنا فيه بشكل او باخر. 

موقف الاخوان لتاني مره

لقد ثبتت الرؤيا اليوم والحقيقه ظهرت وبانت اللي هي ايه؟ الاخوان انا معنديش اي ضغينه ليهم لكن للاسف مواقفهم فعلا شديده الاساءه للثوره والثوار بدايه من اول مظاهره طلعت قبل ما تتقلب لثوره واعلنوها قائلين مش هننضم للمظاهرات واللي هيبقي فيها هم افراد ولا يعبرو عن الجماعه ولما لقوها هتجيب همها والموضوع كبير اعلنو انهم مع الثوره والثوار لا والاغرب انهم نصبو انفسهم حماه الثوره وهما اللي حموا الثوار يوم موقعه الجمل وكانه مكنش فيه ناس غيرهم في الميدان  دورهم يومها لا نقلله لكن التمادي في الشئ غير مقبول تتبعت موقعهم الرسمي من يوم 25 يناير فوجئت ببيانات عجيبه لا اساس لها كل هدفها هو التحايل علي الثوره وسرقتها كده عيني عينك وكان التاريخ ملك ايديهم يزوروه كما يشاءو لكن موقفهم الاخير جه واثبت ان الثوره قامت بالمصريين مش الاخوان واذا كان الاخوان مبداهم هو المشي تحت جناح الحاكم ايا كان فهاهو ظهر للعيان واضحا جليا يعني بالعربي كده هما حبو يجاملو المجلس العسكري لكن ولتاني مره حسو بغلطهم وبتخليهم عن الثوره لكن اللي يهمني هنا هو انه بقي واضح جدا ان الثوره قامت ومازالت قائمه بايد المصريين ككل بدون طوائف او احزاب وسلامات يا جماعه الاخوان اللي كانت محظوره 

حد يقولي ازاي؟

لو كان اللي بيتكلم مجنون ابوس ايديكم يبقي اللي بيستمع عاقل دلوقتي المجلس الاعلي اصدر بيان جديد بيقول فيه انه مش هينزل الميدان عشان الخوف من الوقيعه المتوقعه بين الجيش والشعب طب ده معناه ايه من وجهه نظري المحدوده انه الجيش عارف ان فيه شغب هيحصل وان فيه افراد هيحاولو الاشتباك معاه علي سبيل الاستفزاز ليه عشان يضرب المتظاهرين اما بالرصاص المحرم دوليا او بالحي نقوم نقع في بعض شعب وجيش ونبقي بلد من غير كبير المهم الجيش يخرج من الورطه دي ازاي زي ماهو واضح للعيان فضل الهروب من الميدان لتجنب المخاطر بس ياتري عدم نزوله الميدان هدفه ايه اعتقد ان الهدف واضح ان البلطجيه اللي هما عارفين انهم هينزلو يشتبكو مع المتظاهرين وتتكرر موقعه الجمل تاني وطبعا ده في مصلحه اطراف كتير اهمها الجيش انه يخلص من وجع الدماغ بتاع المتظاهرين كل شويه تحت شعار مش احنا حذرناكم من النزول انتو اللي جبتوه لنفسكم وبرضه لمصلحه الفلول لان كده المتظاهرين هيخافو علي اعمارهم ومش هينزلو التحرير تاني وبكده يبقي خلاص البلد رجعتلهم سالمه غانمه وكله تمام منقدرش ننكر للجيش انه حمي الثوره وانه كبير البلد دلوقتي اللي لازم نحافظ علي هيبته كما هي والا يتم المساس بها باي شكل من الاشكال لكن حل الوقيعه دي كان ممكن يبقي بدل البيان الاخير ده بديل تاني بيقول فيه وبمنتهي الشفافيه والوضوح احنا عارفين ان فيه عناصر هتحاول الاشتباك مع الجيش فنرجو من كل المتظاهرين السلميين انهم يتعاونو معانا في الامساك بهم وتسليمهم فورا منعا لحدوث اي اشتباك بينا وبينكم واحنا زي ما حمينا الثوره في الاول هنكمل معاكم المشوار وهنحميكم حتي تكتمل علي خير ونصل بالبلاد لبر الامان لكن للاسف سوف يكتفي الجيش بحراسه المنشآت طب ازاي؟؟؟؟؟؟؟؟؟؟؟؟؟؟؟؟؟؟؟؟؟؟؟ 

انا اسف يامصر

                                                                                  انا اسف يا مصر اتاخرت عليكي دي كانت لوحه من اللي في التحرير اثناء الثوره لكن فعلا محستش بمعناها الا هذه الايام فما نراه من حقائق ونسمعه من ارقام شئ فعلا يدعو للاسف وابوس ايدك يابلدي سامحينا علي تقصيرنا وتخاذلنا في حقك السنين اللي فاتت للاسف النظام السابق كان عايش في تكيه الشعب المصري وسايبينه مش لاقي رغيف العيش وياعيني لما ربنا يكرمه ويلاقيه يبقي مسرطن وحالته بالبلاء فعلا حسه بالقهر علي البلد واللي جرالها علي ايد شويه حراميه مستغلين نفوذ فضلو مصالحهم الخاصه علي مصلحه شعب باكمله وياريتهم سرقو و نهبو ووفرولنا حياه كريمه لكن للاسف للاسف للاسف عاشو عيشه الملوك والامراء واحنا بنمصمص شفايفنا حسره علي القرش اللي مش لاقينيه واللقمه اللي مش عارفين ناكلها والشباب اللي مش لاقيين شقه يتجوزو فيها الارقام اللي بنسمعها حقيقي مفزعه وزي ماقال مجموعه من العاملين في الجهاز الاداري للمحاسبات ما خفي كان اعظم الي اي مدي وصل توحشهم وفسادهم وجرائمهم في حق الدوله ما سمعته من هؤلاء وجع قلبي وشعرت بالحزن لما وصلنا اليه من سوء الحال وقله الكرامه في حين ان السارقين والناهبين بيلاقو اللي يبوس الايادي شكرا لهم علي الفتافيت او استجاء منهم لمصلحه او سرقه جديده بياخدو الاذن قبل ما يسرقوها فعلا انا اسفه يا بلدي انا وكل المصريين اتاخرنا عليكي قوي بس اكيد ملحوقه ومهما عملو او اثارو الفتن لن يفرقونا وحقنا هناخده  بالكامل ان شاء الله دون ابطاء او تاخير كفانا بطئا كفانا تراخي وتكاسل في حقنا وحق البلد والثوره ان شاء الله هتكمل وبقولها تاني انا اسفه يا بلدي اتاخرت عليكي قوي.